ഇന്ന് ഞായറാഴ്ച പുലർച്ചെയോടെയാണ് മേഖലയിലെ പ്രമുഖ യുഎസ് കേന്ദ്രങ്ങളെ ലക്ഷ്യമിട്ട് ഇറാൻ വൻതോതിൽ ബാലിസ്റ്റിക് മിസൈലുകളും ആത്മഹത്യാ ഡ്രോണുകളും വർഷിച്ചത്.കുവൈത്തിലെ പ്രമുഖ യുഎസ് വ്യോമതാവളമായ ‘അലി അൽ സാലം’, ബഹ്‌റൈനിലെ പോർട്ട് സൽമാനിൽ പ്രവർത്തിക്കുന്ന യുഎസ് അഞ്ചാം നാവിക വ്യൂഹത്തിന്റെ ആസ്ഥാനം എന്നിവയ്ക്ക് നേരെയാണ് ആക്രമണമുണ്ടായത്. കുവൈത്തിലെ താവളത്തിന് നേരെ നടന്ന ആക്രമണത്തിൽ എട്ടോളം പ്രധാന യുഎസ് സൈനിക കേന്ദ്രങ്ങൾ തകർത്തതായി ഇറാന്റെ ഇസ്ലാമിക് റവല്യൂഷണറി ഗാർഡ് കോർപ്സ് അവകാശപ്പെട്ടു. ജോർദാനിലെ ചില യുഎസ് കേന്ദ്രങ്ങൾക്ക് നേരെയും ആക്രമണശ്രമം നടന്നതായാണ് റിപ്പോർട്ട്.
പ്രതികാരം എന്ന് ഇറാൻ; ജാഗ്രതയിൽ ഗൾഫ് രാജ്യങ്ങൾ
തങ്ങളുടെ തീരദേശ റഡാറുകൾക്കും വ്യോമപ്രതിരോധ സംവിധാനങ്ങൾക്കും നേരെ ശനിയാഴ്ച യുഎസ് സെൻട്രൽ കമാൻഡ് (CENTCOM) നടത്തിയ ബോംബാക്രമണത്തിന് മറുപടിയായാണ് ഈ നടപടിയെന്ന് ഇറാൻ വ്യക്തമാക്കി. ഹോർമൂസ് കടലിടുക്കിലൂടെ നീങ്ങിയ ഇന്ധനക്കപ്പലിന് നേരെ ഇറാൻ ഡ്രോൺ ആക്രമണം നടത്തിയെന്നാരോപിച്ചായിരുന്നു യുഎസ് നേരത്തെ വ്യോമാക്രമണം നടത്തിയത്. അമേരിക്കയുടെ ആക്രമണം തുടർന്നാൽ മേഖലയിൽ സമാധാനം പുനഃസ്ഥാപിക്കാനുള്ള എല്ലാ നയതന്ത്ര ചർച്ചകളും അവസാനിപ്പിക്കുമെന്നും വരും ദിവസങ്ങളിൽ യുഎസ് താവളങ്ങൾ ‘നരകമാക്കി’ മാറ്റുമെന്നും ഇറാൻ മുന്നറിയിപ്പ് നൽകി. 
അതേസമയം, ആക്രമണത്തെത്തുടർന്ന് ബഹ്‌റൈനിൽ രാജ്യവ്യാപകമായി വ്യോമാക്രമണ മുന്നറിയിപ്പ് സൈറണുകൾ മുഴങ്ങി. തങ്ങളുടെ വ്യോമാതിർത്തി പ്രതിരോധ സംവിധാനങ്ങൾ ഉപയോഗിച്ച് ശക്തമായി സംരക്ഷിക്കുകയാണെന്ന് കുവൈത്ത് സായുധ സേന അറിയിച്ചു. ആക്രമണങ്ങളിൽ യുഎസ് സൈനികർക്ക് വൻതോതിലുള്ള നാശനഷ്ടങ്ങളോ ആൾനാശമോ സംഭവിച്ചിട്ടില്ലെന്നാണ് പ്രഥമിക യുഎസ് വിലയിരുത്തൽ.
‘ഇറാൻ ഭൂമുഖത്ത് ഉണ്ടാകില്ല’: കടുത്ത മുന്നറിയിപ്പുമായി ട്രംപ്
ഇറാന്റെ മിസൈൽ ആക്രമണത്തിന് പിന്നാലെ കടുത്ത ഭാഷയിലാണ് യുഎസ് മുൻ പ്രസിഡന്റ് ഡൊണാൾഡ് ട്രംപ് പ്രതികരിച്ചത്. ഇറാൻ കരാർ ലംഘനം തുടരുകയും അമേരിക്കൻ താവളങ്ങളെ ലക്ഷ്യമിടുകയും ചെയ്താൽ ശക്തമായ സൈനിക നടപടിയുണ്ടാകുമെന്നും, അതിന് മുതിർന്നാൽ “ഇറാൻ എന്ന രാജ്യം പിന്നീട് ഭൂമുഖത്ത്അവശേഷിക്കില്ല“ എന്നും ട്രംപ് ട്രൂത്ത് സോഷ്യലിലൂടെ മുന്നറിയിപ്പ് നൽകി.
ആക്രമണത്തെ തുടർന്ന് അന്താരാഷ്ട്ര വിപണിയിൽ എണ്ണവില വർദ്ധിക്കുമെന്ന ആശങ്ക ശക്തമായിട്ടുണ്ട്. ഗൾഫ് മേഖലയിലെ കപ്പൽ ഗതാഗതത്തിനും വ്യോമപാതകൾക്കും കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്.
