പ്രധാനമന്ത്രിയുടെ ചടങ്ങിൽ ‘വന്ദേമാതരം’ ഒഴിവാക്കി; വേദിയിൽ ഉയർന്നത് തമിഴ് തായ്‌വാഴ്ത്തും ദേശീയഗാനവും

തമിഴ്‌നാട്ടിൽ പ്രധാനമന്ത്രി നരേന്ദ്ര മോദി പങ്കെടുത്ത ഔദ്യോഗിക പരിപാടിയിൽ ‘വന്ദേമാതരം’ ആലപിക്കാതിരുന്നത് രാഷ്ട്രീയ കേന്ദ്രങ്ങളിൽ ചർച്ചയാകുന്നു. മദ്രാസ് ഐഐടിയിൽ നടന്ന 13,000 കോടി രൂപയുടെ വികസന പദ്ധതികളുടെ സമർപ്പണ വേദിയിലാണ് ഈ സംഭവം.
സാധാരണയായി കേന്ദ്ര സർക്കാരിന്റെയോ പ്രധാനമന്ത്രിയുടെയോ സാന്നിധ്യത്തിലുള്ള പരിപാടികളിൽ വന്ദേമാതരം ആലപിക്കാറുണ്ടെങ്കിലും, ഇവിടെ ചടങ്ങിന്റെ തുടക്കത്തിൽ ദേശീയഗാനവും തൊട്ടുപിന്നാലെ തമിഴ്‌നാടിന്റെ സംസ്ഥാന ഗാനമായ ‘തമിഴ് തായ്‌വാഴ്ത്തു’മാണ് ആലപിച്ചത്. ചടങ്ങിൽ പ്രധാനമന്ത്രിക്കൊപ്പം മുഖ്യമന്ത്രിയും തമിഴ്‌നാട് ഗവർണറും മറ്റ് ഉന്നത നേതാക്കളും വേദി പങ്കിട്ടിരുന്നു.
ചെന്നൈ മെട്രോ രണ്ടാം ഘട്ട സർവീസിന്റെ ഉദ്ഘാടനമടക്കം സുപ്രധാന പദ്ധതികൾ പ്രഖ്യാപിച്ച ചടങ്ങിൽ, പ്രോട്ടോക്കോൾ ക്രമീകരണങ്ങളിലെ ഈ മാറ്റം ഇതിനകം തന്നെ മാധ്യമങ്ങളിലും രാഷ്ട്രീയ വൃത്തങ്ങളിലും വലിയ ചർച്ചയ്ക്ക് വഴിവെച്ചിട്ടുണ്ട്.