വാഹനാപകടത്തിൽ ഓട്ടോഡ്രൈവർ മരിച്ചു.

പുനലൂർ – മൂവാറ്റുപുഴ പാതയിൽ നെല്ലിപ്പള്ളി തിരുഹൃദയ ദേവാലയത്തിന് മുൻപിലാണ് അപകടം. ഓട്ടോ ഡ്രൈവർ പത്തനാപുരം കടയ്ക്കാമൺ സ്വദേശി 30 വയസ്സുള്ള മഹേഷ് ആണ് മരിച്ചത്. പത്തനാപുരത്ത് നിന്നും പുനലൂരിലേക്ക് വരികയായിരുന്ന കാറും പുനലൂരിൽ നിന്നും പത്തനാപുരത്തേക്ക് പോകുകയായിരുന്ന ഓട്ടോറിക്ഷയും തമ്മിലാണ് കൂട്ടിയിടിച്ചത്. അമിത വേഗത്തിൽ എത്തിയ കാർ ബസ്സിനെ ഓവർടേക്ക് ചെയ്യുന്നതിനിടെ എതിർ ദിശയിൽ നിന്നും വന്ന ഓട്ടോറിക്ഷയിൽ ഇടിക്കുകയായിരുന്നു എന്ന് ദൃക്സാക്ഷികൾ പറഞ്ഞു. ഇടിയുടെ ആഘാതത്തിൽ പിറകോട്ട് നിരങ്ങി നീങ്ങിയ ഓട്ടോറിക്ഷയുടെ തൊട്ടു പിന്നിലായി വന്ന മറ്റൊരു കാറിൽ ഇടിച്ചു നിന്നു. രണ്ട് വാഹനങ്ങളുടെയും ഇടയിൽ പെട്ട് ഓട്ടോറിക്ഷ പൂർണമായും തകർന്നു. മഹേഷിനെ പുനലൂർ താലൂക്ക് ആശുപത്രിയിലേക്ക് കൊണ്ട് പോകുംവഴിയാണ് മരണം സംഭവിച്ചത്. ഓട്ടോറിക്ഷ വാടകയ്ക്കെടുത്ത് ഓടിച്ച് ഉപജീവനം നടത്തുന്ന ആളായിരുന്നു മഹേഷ്. വിവാഹിതനും ഒരു കുട്ടിയുടെ പിതാവുമാണ്.