പമ്പ: നിലയ്ക്കല്‍-പമ്പ പാതയില്‍ അട്ടത്തോടിന് സമീപം കെയുആര്‍ടിസി ജന്റം ബസ് തീ പിടിച്ച് പൂര്‍ണമായും കത്തി നശിച്ചു. ഇന്ന് പുലര്‍ച്ചെ അഞ്ചരയോടെയാണ് സംഭവം. പമ്പയില്‍ ആളെ ഇറക്കിയ ശേഷം നിലയ്ക്കലിലേക്ക് ചെയിന്‍ സര്‍വീസിന് വന്ന പേരൂര്‍ക്കട ഡിപ്പോയിലെ ബസിനാണ് തീപിടിച്ചത്. ഡ്രൈവറും കണ്ടക്ടറും മാത്രമാണ് ബസിലുണ്ടായിരുന്നത്. ബോണറ്റിന് സമീപം നിന്ന് തീ പടരുന്നത് കണ്ട് ജീവനക്കാര്‍ വാഹനം നിര്‍ത്തിയ ശേഷം അഗ്നിശമന യന്ത്രം ഉപയോഗിച്ച് അണയ്ക്കാന്‍ നോക്കിയെങ്കിലും കഴിഞ്ഞില്ല. ഇതിനിടെ ബസിലുണ്ടായിരുന്ന സാധനങ്ങള്‍ പൂര്‍ണമായും നീക്കി. പിന്നാലെ വന്ന വാഹനങ്ങളില്‍ നിന്നുള്ള ആറോളം അഗ്നിശമന യന്ത്രങ്ങള്‍ ഉപയോഗിച്ചെങ്കിലും തീ ആളിപ്പടര്‍ന്നു. വിവരമറിഞ്ഞ് ഫയര്‍ ഫോഴ്‌സിന്റെ മൂന്നു യൂണിറ്റ് വാഹനങ്ങളും ഇരുപതോളം ഉദ്യോഗസ്ഥരും സ്ഥലത്ത് വന്ന് ഒന്നര മണിക്കൂറോളം പണിപ്പെട്ടാണ് തീ പൂര്‍ണമായും അണച്ചത്. പക്ഷേ, ബസ് പൂര്‍ണമായും കത്തി നശിച്ചു.
Keep Up to Date with the Most Important News
